Астана, 6 қазан 2025 жыл – Karavan Info ақпараттық агенттігі.Астанада Қазақстан Республикасының Экология және табиғи ресурстар министрі Ерлан Нысанбаев Иран Ислам Республикасының Төтенше және Өкілетті Елшісі Али Акбар Джоукармен кездесті. Тараптар екіжақты ынтымақтастықтың өзекті мәселелерін және Каспий теңізінің теңіз ортасын қорғауды талқылады.

Министр Нысанбаев ирандық тарапқа Қазақстанның ШЫҰ және АӨСШК аясындағы экологиялық бастамаларына, оның ішінде ерекше қорғалатын аумақтарды дамыту, қалдықтарды басқару, климаттың өзгеруіне бейімделу жөніндегі құжаттарды қолдағаны үшін ризашылығын білдірді.

Ынтымақтастықты одан әрі дамыту үшін тараптар қоршаған ортаны қорғау саласындағы ынтымақтастық туралы меморандумды тез арада жасасуға мүдделі екендіктерін растады. Ол шөлейттенумен күресуге және шаңды дауылдардың салдарын болдырмауға ерекше назар аударады.

Кездесу барысында министр Каспий теңізінің Қазақ ғылыми-зерттеу институтының құрылуы туралы хабардар етіп, өңірдің ғылыми әлеуетін арттыру үшін Каспий маңы елдерінің ғылыми институттары арасында ынтымақтастық орнатудың маңыздылығына тоқталды.

Нысанбаев сондай-ақ Мемлекет басшысының тапсырмасына сәйкес Каспий теңізінің су ресурстарын сақтаудың мемлекетаралық бағдарламасын әзірлеу жоспары барын айтып, бұл мәселеде Иранның қолдауына үміт артатынын жеткізді.

Елші Әли Акбар Джукар өз кезегінде Тегеран конвенциясының Тараптар Конференциясын (COP-7) өткізудің маңыздылығына тоқталып, министр Нысанбаевты Иранға жұмыс сапарымен келуге шақырды.

Кездесу соңында Қазақстан тарапы Иранды 2026 жылғы 22-24 сәуірде Астанада өтетін Орталық Азия өңірлік экологиялық саммитіне белсенді қатысуға шақырды.

Фото: Қазақстан Республикасы Экология және табиғи ресурстар министрлігі