Астана, 2026-жылдын 29-январы – Karavan Info маалымат агенттиги . Эл аралык эксперттер Казакстанда татыктуу эмгекти илгерилетүү маселелерин талкуулап жатышат. Тегерек столду Астанада Эл аралык эмгек уюму (ЭЭУ) уюштурган.

Иш-чарага БУУнун, Эл аралык эмгек уюмунун, Эмгек жана калкты социалдык жактан коргоо министрлигинин, Профсоюздар федерациясынын жана Жумуш берүүчүлөрдүн улуттук конфедерациясынын өкүлдөрү катышууда.

Мамлекеттик эмгек инспекциясы комитетинин төрагасы Мейрамбек Ахметов Татыктуу эмгекти илгерилетүү боюнча жол картасынын аткарылышы тууралуу айтып берди. Ал 30 жылдык кызматташуунун ичинде Казакстан ЭЭУнун 26 негизги конвенциясын ратификациялаганын белгиледи.

«2024-жылдын сентябрь айында ЭЭУнун башкы директору Гилберт Хоунгбо Казакстанга барып, биздин реформаларды жогору баалады», – деди Ахметов.

Ал ЭЭУ менен биргелешкен иш беш багытты камтыйт деп билдирди: коопсуз жумуш, социалдык диалог, минималдуу эмгек акы, социалдык камсыздоо жана жумуштагы зомбулукту жоюу.

Эксперттер Казакстандын институционалдык түзүмүн, социалдык диалогдун принциптерин, биригүү эркиндигин жана социалдык өнөктөштүк жөнүндө мыйзам долбоорун иштеп чыгуунун артыкчылыктуу багыттарын талкуулашат.

Сүрөт : Казакстан Республикасынын Эмгек жана социалдык коргоо министрлиги