2026-жылдын 30-январында тышкы иштер министринин орун басары Кайрат Турсункулов Индиянын Кыргызстандагы элчиси Бирендер Сингх Ядав менен жолугушту. Бул тууралуу Кыргызстандын Тышкы иштер министрлиги билдирди.
Жолугушуунун жүрүшүндө тараптар кыргыз-индиялык кызматташтыктын актуалдуу маселелеринин кеңири чөйрөсүн талкуулашты, өзгөчө социалдык долбоорлорду практикалык ишке ашырууга көңүл бурушту.
Соода-экономикалык, саламаттыкты сактоо, маданий жана гуманитардык тармактарда кызматташууну андан ары өнүктүрүүгө өз ара кызыкчылык баса белгиленип, жогорку жана эң жогорку деңгээлдерде, анын ичинде алдыдагы көп тараптуу иш-чаралардын алкагында үзгүлтүксүз саясий байланыштарды сактоонун маанилүүлүгү белгиленди.
Жолугушуунун жыйынтыгында тараптар кыргыз-индиялык стратегиялык өнөктөштүктү андан ары чыңдоо үчүн биргелешип иштөөгө даяр экендиктерин ырасташты.
2026-жылдын 31-январы, саат 22:46:03