Oʻzbekiston terma jamoasining Jakartada boʻlib oʻtayotgan 2026-yilgi Osiyo futzal kubogidagi ishtiroki davomida Oʻzbekiston delegatsiyasi ushbu sport turi boʻyicha xalqaro hamkorlikni rivojlantirishga qaratilgan bir qator ishchi uchrashuvlar oʻtkazdi.

Oʻzbekiston futzal federatsiyasi raisi Behzod Mamatqulov boshchiligidagi delegatsiya Indoneziya futzal federatsiyasi rahbari Maykl Sianipar bilan uchrashdi.

Tomonlar ikki tomonlama hamkorlikni kengaytirish, jumladan, yoshlar futzalini qoʻllab-quvvatlash, qoʻshma oʻquv-mashgʻulot yigʻinlarini oʻtkazish va xalqaro turnirlarni tashkil etish masalalarini muhokama qilishdi.

Osiyo mamlakatlari ishtirokidagi 20 yoshgacha bo'lgan terma jamoalar o'rtasida xalqaro futzal turnirini o'tkazish tashabbusiga alohida e'tibor qaratildi. Musobaqa yosh futbolchilarni tayyorlash, murabbiylik tajribasi bilan almashish va mintaqada futzalni ommalashtirish uchun platforma bo'lib xizmat qilishi kutilmoqda. Shuningdek, turnirni Osiyo futbol konfederatsiyasi homiyligida o'tkazish imkoniyati ham muhokama qilindi.

Uchrashuv davomida Indoneziya tomoni so'nggi yillarda O'zbekiston futbolining rivojlanishi, milliy terma jamoaning FIFA reytingida ko'tarilganini ta'kidlab, O'zbekiston terma jamoasini Jahon chempionatiga yo'llanma olgani bilan tabrikladi.