Айыл чарба министрлигинин басма сөз кызматы билдиргендей, жыл башынан бери жалпысынан 81,4 миллион сомго 42 техника лизингге берилген.

Ведомствонун маалыматы боюнча, акыркы жылдары Кыргыз Республикасынын Суу чарба, айыл чарба жана кайра иштетүү өнөр жай министрлиги айыл чарба өндүрүүчүлөрүнүн машина-трактор паркын жаңыртуу жана толуктоо, ошондой эле дыйкандарды заманбап айыл чарба техникалары менен камсыз кылуу боюнча системалуу иш алып барууда.

Айыл чарба өндүрүүчүлөрүнө механикалаштырылган кызматтарды өз убагында жана сапаттуу көрсөтүүнү камсыз кылуу, ошондой эле лизингди өнүктүрүү үчүн жагымдуу шарттарды түзүү максатында, 2011-жылдан бери министрликтин демилгеси жана Кыргыз Республикасынын Министрлер Кабинетинин колдоосу менен "Айыл Банк" жана "Элдик Банк" ачык акционердик коомдору аркылуу айыл чарба техникаларын жана жабдууларын берүү боюнча 7 лизинг долбоору ишке ашырылган.

Бул долбоорлор айыл чарба өндүрүүчүлөрүнө бардык түрдөгү айыл чарба техникалары, ошондой эле кайра иштетүү өнөр жайы үчүн жабдуулар үчүн жеңилдетилген шарттарды берет. Лизинг жылдык 6 пайыздык чен менен 7 жылга чейин берилет.

Бүгүнкү күнгө чейин мамлекеттик лизинг программалары боюнча дыйкандарга 27,7 миллиард сомдук 9725 бирдик айыл чарба техникасы өткөрүлүп берилген. Анын ичинде 2026-жылы берилген 81,4 миллион сомдук 42 бирдик техника да бар.

2026-жылдын 10-февралы, саат 6:49:49