Әл-Фараби атындағы Қазақ ұлттық университетінің Басқарма төрағасы – ректоры Жансейіт Түймебаев Гарвард университетінің Чан қоғамдық денсаулық сақтау мектебінің академиялық істер жөніндегі деканы Хорхе Чавваромен кездесті.
Келіссөздер барысында тараптар білім беру және ғылым саласындағы бірлескен жобалардың болашағын талқылады. Студенттер мен жас ғалымдар үшін академиялық мобильділікті дамытуға, сондай-ақ ғылыми тәжірибе алмасу және озық зерттеу әдістерін дамыту үшін жағдайлар жасауға ерекше назар аударылды.
Жансейіт Түймебаев өз сөзінде ҚазҰУ-дың ғылым мен білім беру саласындағы жетістіктерін атап өтті, тыңдаушыларды университеттің АҚШ-тың жетекші жоғары оқу орындарымен жасасқан келісімдері туралы хабардар етті және ҚазҰУ-дағы медицина және денсаулық сақтау факультетінің табысты жұмысын атап өтті. Осыған байланысты ҚазҰУ-дың медицина және денсаулық сақтау факультеті мен Чан қоғамдық денсаулық сақтау мектебі арасындағы ынтымақтастықты дамыту бастамасы көтерілді, оның ішінде инновациялық ғылыми жобаларды жүзеге асыру және бірлескен білім беру бағдарламаларын әзірлеу.
Өз кезегінде Хорхе Чавваро ұсынылған бастамаларды қолдайтынын білдіріп, ҚазҰУ-мен серіктестікті нығайтуға мүдделі екенін растады.
Кездесу қорытындысы бойынша тараптар алдағы бірлескен іс-қимыл жоспарын келісті және қол жеткізілген келісімдерді жүзеге асыруға бағытталған меморандум дайындауға келісті.
Әл-Фараби атындағы ҚазҰУ баспасөз қызметі