23 апрел куни Сурхондарё вилоятининг Термиз шаҳрида Ҳинд океани портларига чиқиш учун транспорт бошқармалари, экспедиторлик компаниялари раҳбарлари ва бизнес вакиллари иштирокида «Беларусь – Россия – Қозоғистон – Ўзбекистон – Афғонистон – Покистон» мультимодал транспорт йўлагини ривожлантириш бўйича халқаро учрашув бўлиб ўтди.

Термиз шаҳрида транспорт соҳаси ташкилотлари вакиллари ва бизнес делегацияларининг учрашуви ўзаро савдо ва қуруқлик йўлаклари бўйлаб халқаро юк ташиш ҳажмини оширишга қаратилган.

Бундай тадбирлар турли транспорт компаниялари ва бизнес тузилмалари ўртасидаги ҳамкорликни ривожлантириш учун асос яратади, бу эса ўз навбатида логистика жараёнларини такомиллаштиришга имкон беради. В2В ва G2B форматидаги учрашувлар минтақавий юк ташишни ташкил этиш имкониятларини тўлиқ кашф этишга тўсқинлик қиладиган муаммо ва камчиликларни аниқлашга ёрдам беради.

Учрашув иштирокчиларининг расмий иш жараёни Термиз халқаро савдо марказига ташрифи билан бошланди, унда делегациялар вакиллари янги марказнинг мавжуд инфратузилмаси билан танишдилар ва Ўзбекистондан/Ўзбекистонга юк ташишни кўпайтириш бўйича олиб борилаётган ишлар тўғрисида маълумот олдилар.

Тадбир якунида делегациялар ва ишбилармон доиралар вакиллари бир вақтнинг ўзида темир йўл ва автомобил транспорти ва фуқароларнинг ўтиши учун хизмат кўрсатиш имкониятига эга бўлган «Айритом» халқаро чегара божхона постига ҳам ташриф буюришди.

Беларусь–Россия–Қозоғистон–Ўзбекистон–Афғонистон–Покистон транспорт коридорлари тўғрисидаги битим 2023 йил 1 ноябрда Тошкентда имзоланди. Ушбу халқаро мультимодал транспорт йўлаги МДҲ давлатларини Ҳинд океани мамлакатлари билан боғлайдиган стратегик муҳим бўғин ҳисобланади.