Shavkat Mirziyoyev Navoiy viloyati, Navbahor tumanidagi politeхnikumga tashrif buyurdi. Hozirgi kunda Navoiy viloyatida 25 ta kasb-hunar ta’limi muassasasi faoliyat ko‘rsatib, ularda 12 mingdan ortiq yoshlar ta’lim oladi. Bu muassasalarda malakali pedagoglar va 230 dan ortiq ishlab chiqarish o‘qituvchilari faoliyat yuritmoqda.

2-sonli politeхnikum zamonaviy o‘quv auditoriyalari va laboratoriyalar, akt va sport zallari, yotoqxonalar va oshxona bilan ta’minlangan. Ta’lim kunduzgi, kechki, sirtqi va dual shakllarda olib borilib, turli yosh toifalari uchun mo‘ljallangan.

Navoiy viloyatidagi yirik sanoat korxonalari malakali mutaxassislarni tayyorlashda faol ishtirok etadi. Masalan, Navoiy kon-metallurgiya kombinati talabalarni payvandchi va tokarlikka, “Navoiyazot” korxonasi esa kimyogar-laborantlarga o‘qitadi. Navoiy issiqlik elektr stansiyasi esa elektromontyorlarni tayyorlaydi. Bu korxonalar texnikumda o‘z o‘quv bo‘limlarini tashkil qilgan bo‘lib, talabalar ilk kasb mahoratlarini egallash bilan birga, dastlabki ish haqlarini topishadi.

Texnikum mahallalar bilan hamkorlikda ishsiz fuqarolarni, yetarli malakaga ega bo‘lmaganlarni va yangi kasb o‘rganishni xohlayotgan ayollarni o‘qishga jalb qilmoqda. Eng yaxshi bitiruvchilar viloyatdagi korxonalarga ishga joylashtiriladi. Prezident bu yerda ta’lim olayotgan ayollar bilan suhbatlashib, ularning yangi bilim va kasblarni egallashga bo‘lgan intilishlarini qo‘llab-quvvatlash zarurligini ta’kidladi.

Bundan tashqari, Mengi Textile Group va Navbahor Qorajon tekstil korxonalari bilan hamkorlikda dual va qisqa muddatli kurslar tashkil etilgan. Ayollar o‘qishni tamomlagandan so‘ng tikuvchilik sexlarida ishlash imkoniga ega bo‘lishadi. Texnikumning duradgorlik ustaxonasida talabalar stollar, eshiklar va stullar yasab, oilalariga ko‘maklashish bilan birga, kasb mahoratlarini oshirmoqda.

Shuningdek, imkoniyati cheklangan kishilar uchun milliy hunarmandchilik mahsulotlarini tayyorlash bo‘yicha kurslar ochilgan, veterinar va chorvachilikka oid boshqarmalar huzurida esa mutaxassislar malakasini oshirish markazlari tashkil etilgan.