Shavkat Mirziyoyev yoshlarni sportga jalb qilish bo‘yicha takliflar bilan tanishdi. Ushbu tashabbuslar “O‘zbekiston — 2030” strategiyasi va Yoshlar hamda biznesni qo‘llab-quvvatlash yili davlat dasturi doirasida amalga oshirilmoqda.

Bugungi kunda 10 milliondan ortiq odam sport bilan shug‘ullanmoqda. Mamlakatning barcha hududlarida ta’lim muassasalari va mehnat jamoalarida musobaqalar faol ravishda o‘tkazilmoqda. Yangi bosqichda jamoaviy sport turlarini ommalashtirish, sport ligalari va klublarini tashkil etish hamda yoshlar bilan ishlashni kuchaytirish maqsad qilingan.

“Mahalla ligasi”, “Maktab ligasi” turnirlari, shuningdek, talabalar o‘rtasida “Vazir kubogi” va “Rektor kubogi” musobaqalarini o‘tkazish rejalashtirilmoqda. Milliy ligalarni qo‘llab-quvvatlash va mahalliy hokimliklar huzurida mintaqaviy klublar tashkil qilish ham ko‘zda tutilgan. Yangi sport iste’dodlarini aniqlash uchun esa “ERP Sport” elektron tizimi joriy etiladi.

Sport bilan muntazam shug‘ullanish sharoitlarini yaxshilashga alohida e’tibor qaratilmoqda. Masalan, har hafta ommaviy jismoniy faollik kuni uchun bir kun ajratish taklif etilgan. Mahallalarda sport to‘garaklarini tashkil qilayotgan murabbiylar qo‘shimcha rag‘batlantiriladi. Sport maktablari alohida yo‘nalishlarga ixtisoslashadi, ularning xodimlari esa erishilgan natijalari uchun ustama oladilar.

Prezident ta’kidlashicha, sport jismonan va ma’nan yetuk avlodni tarbiyalashga qaratilgan davlat yoshlar siyosatining muhim qismi hisoblanadi.