Грузияның Конституциялық соты ел Президенті Саломе Зурабишвили мен 26 қазанда өткен парламенттік сайлаудың қорытындыларын конституциялық емес деп тануды талап еткен 30 оппозициялық депутаттың талаптарын қанағаттандырмады. Жарияланған сот қаулысында бұл шешімнің түпкілікті екендігі және шағымдануға жатпайтындығы көрсетілген.

Сайлау қорытындысы бойынша «Грузин арманы» басқарушы партиясы 89 мандат алды, ал оппозициялық коалициялар — «өзгерістер үшін», «Бірлік», «Күшті Грузия» және «Грузия үшін» — 61 мандат алды. Алайда оппозиция жаппай бұрмалаушылық туралы мәлімдеді, нәтижелерді мойындаудан бас тартты және парламенттік отырыстарға бойкот жариялады.

Грузия Президенті Саломе Зурабишвили оппозицияны қолдап, сайлауды «жалпы бұрмалау» деп атады және конституциялық сотқа шағым түсірді. Ол сондай-ақ азаматтарды наразылық білдіруге шақырды.

Сайлау нәтижелеріне қарсы жаппай наразылықтар жалғасуда. Желтоқсан айының ортасында президенттік өкілеттіктің аяқталуына қарамастан, Зурабишвили жағдай тұрақталғанға дейін қызметінен кетпейтінін мәлімдеді.

«Менің өкілеттіктерім ресми түрде аяқталған болса да, мен елді мұндай хаоста қалдырмаймын», — деді президент жақында сөйлеген сөзінде.

Басқарушы партия 14 желтоқсанда президенттік сайлау өткізетінін жариялады. Олардың кандидаты-Михаил Кавелашвили, бұрынғы футболшы және Батысқа қарсы риторикасымен танымал депутат.

«Грузияға елдің егемендігі мен мүдделерін қорғайтын мықты көшбасшы қажет», — деді Грузин арманы партиясы.

Тоғыз судьяның жетеуі сот ісін қараудан бас тартуды қолдады. Сарапшылардың пікірінше, бұл шешім қоғамның едәуір бөлігінің сотқа және билеуші партияға деген сенімсіздігін ескере отырып, саяси дағдарысты күшейтеді.

Оппозиция парламентке бойкот жариялауды жалғастыруға және наразылықтар арқылы билікке қысымды күшейтуге ниетті.

Фото: @salome_zourabichvili