Кыргыз Республикасынын Министрлер Кабинетинин Төрагасынын биринчи орун басары Адылбек Касымалиев Ислам өнүктүрүү банкы тобунун башкаруучуларынын 49-жыйынынын жүрүшүндө интеллектуалдык билим берүүнү (SmartEd) каржылоого арналган Араб координациялык тобунун форумунда сөз сүйлөдү.

«Учурда биздин Билим берүү жана илим министрлиги «Алтын казык» программасын иштеп чыкты. Бул программа 12 жылдык билим берүү системасына өтүүнү, STEM предметтери боюнча мыкты окуу китептерин алууну, билим берүүнү санариптик трансформациялоону, мугалимдердин кесипкөйлүгүн жогорулатууну санариптик колдоону, билим берүүдөгү башкаруу процесстерин санариптештирүүнү камтыйт», — деп белгиледи А. Касымалиев.

Бул программа Кыргызстандын жаштарын өнүктүрүүгө кошумча мүмкүнчүлүктөрдү түзүп, эмгек рыногунда өсүп келе жаткан муундун атаандаштыкка жөндөмдүүлүгүн камсыздайт деп күтүлүүдө.

Министрлер Кабинетинин Төрагасынын биринчи орун басары ошондой эле форумдун жүрүшүндө №4 Туруктуу өнүгүү максаттарынын индикаторлорун жакшыртуу «Сапаттуу билим берүү» Кыргызстандын 2030-жылга чейинки ишинин негизги багыттарынын бири катары аныкталганын белгиледи.

«2023-жылдын жыйынтыгы боюнча Кыргызстан Туруктуу өнүктүрүү максаттары боюнча дүйнөдөгү 166 өлкөнүн ичинен 45-орунга чыкты жана Борбордук Азия өлкөлөрүнүн арасында лидер болуп саналат», — деп белгиледи Адылбек Касымалиев.

Сүрөт: Кыргыз Республикасынын Министрлер Кабинетинин расмий сайты