Қырғыз Республикасы Министрлер Кабинеті Төрағасының бірінші орынбасары Әділбек Қасымалиев Ислам даму банкі тобы басқарушыларының 49-шы жыл сайынғы кездесуі барысында зияткерлік білім беруді қаржыландыруға арналған (SmartEd) Араб Үйлестіру тобының форумында сөз сөйледі.

«Қазіргі уақытта біздің білім және ғылым министрлігі «Алтын қазық» бағдарламасын әзірледі. Бұл бағдарлама 12 жылдық білім беру жүйесіне көшуді, STEM-пәндер бойынша үздік оқулықтарды сатып алуды, білім беруді цифрлық трансформациялауды, мұғалімдердің кәсіби дамуын цифрлық қолдауды, білім берудегі басқару процестерін цифрландыруды қамтиды»,-деп атап өтті А.Қасымалиев.

Бұл бағдарлама Қырғызстан жастарының дамуына қосымша мүмкіндіктер береді және жас ұрпақтың еңбек нарығында бәсекеге қабілеттілігін қамтамасыз етеді деп күтілуде.

Министрлер Кабинеті Төрағасының бірінші орынбасары форум барысында Қырғызстан жұмысының негізгі бағыттарының бірі ретінде 2030 жылға дейін №4 «сапалы білім беру» орнықты даму мақсаттарының көрсеткіштерін жақсарту белгіленгенін атап өтті.

«2023 жылдың қорытындысы бойынша Қырғызстан орнықты даму мақсаттарының көрсеткіштері бойынша әлемнің 166 елінің ішінен 45-ші орынды иеленді және Орталық Азия елдері арасында көшбасшы», — деп атап өтті Әділбек Қасымалиев.

Фото: Қырғыз Республикасы Министрлер Кабинетінің ресми сайты