Ozarbayjon Respublikasi Fan vazirligi va Sog‘liqni saqlash vazirligi vakillari O‘zbekiston Raqamli texnologiyalar vazirligiga tashrif buyurdi. Delegatsiyani qabul qilgan vazir o‘rinbosari mamlakatda IT sohasini rivojlantirish uchun yaratilgan sharoitlar, amalga oshirilayotgan loyihalar va mavjud imkoniyatlar haqida ma’lumot berdi.

Tashrif doirasida “O‘ZINFOCOM” yagona integratori faoliyati, jumladan, amalga oshirilgan loyihalar, ularning natijalari va kelajak rejalari taqdimoti o‘tkazildi. Delegatlar innovatsion yechimlar, davlat xizmatlarini raqamlashtirish va mamlakatning IT infratuzilmasini rivojlantirishdagi yutuqlar haqida batafsil ma’lumotga ega bo‘lishdi.

IT-parklar faoliyati, startap ekotizimi va IT-ta’lim sohasidagi islohotlarga alohida e’tibor qaratildi. Mehmonlar yoshlarni qo‘llab-quvvatlashga yo‘naltirilgan loyihalar, davlat va xususiy sektor hamkorligi hamda mutaxassislar tayyorlash dasturlarini yuqori baholadilar.

Ushbu tashrif axborot texnologiyalari sohasida tajriba almashish va ikki mamlakat o‘rtasidagi kasbiy aloqalarni mustahkamlashga xizmat qildi.