UI GreenMetric — universitetlarning barqaror rivojlanish va atrof-muhitni muhofaza qilish sohasidagi ekologik sa’y-harakatlarini baholovchi xalqaro reytingdir. U 2010-yilda Indoneziya universiteti tomonidan yaratilgan bo‘lib, oltita asosiy mezon bo‘yicha 39 ta ko‘rsatkichni o‘z ichiga oladi: energetika va iqlim, suv va chiqindilar, transport, binolar va infratuzilma, ta’lim va tadqiqotlar, hamda boshqaruv.

2024-yilda reytingga 95 ta davlatdan 1477 ta universitet, jumladan, O‘zbekistondan 52 ta oliy o‘quv yurti kiritilgan. O‘zbekiston universitetlari orasida Toshkent davlat yuridik universiteti, Toshkent davlat iqtisodiyot universiteti va Alisher Navoiy nomidagi Toshkent davlat o‘zbek tili va adabiyoti universiteti eng yuqori o‘rinlarni egalladi.

Reyting universitetlarning energiya iste’molini va suv resurslarini kamaytirish, chiqindilarni qayta ishlash tizimlarini joriy etish hamda qurilishda ekologik texnologiyalardan foydalanish bo‘yicha sa’y-harakatlarini hisobga oladi. Shuningdek, ekologiya va barqaror rivojlanish sohasidagi o‘quv dasturlari, ushbu yo‘nalishdagi ilmiy tadqiqotlar va ishlanmalar ham baholanadi.