O‘zbekiston Raqamli texnologiyalar vaziri Sherzod Shermatov Saudiya Arabistoni Aloqa va axborot texnologiyalari vaziri Abdulla Alsvaxa bilan uchrashdi. Tomonlar ikki tomonlama hamkorlik istiqbollarini va qo‘shma loyihalarni amalga oshirish masalalarini muhokama qildilar.

Asosiy e’tibor raqamli infratuzilmani rivojlantirish, jumladan, telekommunikatsiya va ma’lumot almashish markazlarini tashkil etishga qaratildi. IT sohasida mutaxassislarni o‘qitish va malakasini oshirish dasturlari orqali tayyorlashga alohida urg‘u berildi.

Uchrashuvda O‘zbekistonning raqamli salohiyatini xalqaro maydonda ilgari surish va IT-autsorsing ko‘lamini kengaytirish imkoniyatlari muhokama etildi. Saudiya kompaniyalariga startap ekotizimini rivojlantirish va IT sohasida yangi ish o‘rinlarini yaratish maqsadida O‘zbekistonda mintaqaviy ofislar ochish taklif qilindi.

Shuningdek, tomonlar Saudiya Arabistonining raqamli transformatsiya sohasidagi tajribasini o‘rganish va O‘zbekistonda ilg‘or amaliyotlarni joriy etish bo‘yicha kelishib oldilar.

Uchrashuv yakunida mamlakatlar o‘rtasidagi hamkorlikni mustahkamlashga asos bo‘ladigan memorandum imzolandi. Ushbu kelishuv IT sohasidagi munosabatlarni rivojlantirishga yangi turtki berishi va har ikki davlat uchun yangi imkoniyatlar ochishi kutilmoqda.