Shavkat Mirziyoyev 2024-yilda investitsiya sohasida erishilgan yutuqlarni muhokama qilib, kelgusi yilga mo‘ljallangan vazifalarni belgilab berdi.

2017-yildan buyon mamlakat iqtisodiyotiga 188 milliard dollar jalb etilgan bo‘lib, shundan 87 milliard dollari xorijiy sarmoyalardir. Ushbu investitsiyalar ularning yalpi ichki mahsulotdagi ulushini 30 foizdan yuqoriga ko‘tarib, barqaror iqtisodiy o‘sish uchun poydevor bo‘ldi.

2024-yilda investitsiyalar hajmi 1,3 barobarga oshib, 36 milliard dollardan oshdi. Yil davomida 70 trillion so‘mlik 560 ta yirik va o‘rta loyihalar ishga tushirildi, bu esa 2025-yilda eksportni bir milliard dollarga oshirish imkoniyatini yaratadi.

Yig‘ilishda investitsiyalar, sanoat va savdo vaziri kelgusi yilga mo‘ljallangan rejalarni taqdim etdi. 43 milliard dollarlik investitsiyalarni o‘zlashtirish rejalashtirilgan bo‘lib, bu 300 dan ortiq yirik loyihalarni amalga oshirish, shuningdek, import bilan raqobatlasha oladigan 662 turdagi yangi mahsulotlar ishlab chiqarishni yo‘lga qo‘yish imkonini beradi.

Prezident xorijiy investorlar bilan manzilli ishlash, ular uchun qulay shart-sharoitlar yaratish va barcha kelishuvlarni amalga oshirish muhimligini ta’kidladi. Bugungi kunda mas’ul rahbarlar tayinlangan 1890 ta loyiha bo‘yicha faol ish olib borilmoqda.

2030-yilgacha eksport hajmini ikki barobarga oshirib, 45 milliard dollarga yetkazish maqsad qilib qo‘yilgan. Bunga erishish uchun loyihalarni o‘z vaqtida ishga tushirish, yuqori qo‘shilgan qiymatli mahsulotlar ishlab chiqarishni ko‘paytirish va sotish bozorlarini kengaytirish muhim ahamiyatga ega.