Senatning yalpi majlisida ‘O‘zbekiston Respublikasi Jinoyat kodeksining 135-moddasiga o‘zgartish kiritish to‘g‘risida»gi qonun muhokama qilinib, ma’qullandi. Ushbu qonun odam savdosi uchun javobgarlikni kuchaytirishga qaratilgan.

Majlisda fuqarolarning huquq va erkinliklarini himoya qilish hamda odam savdosiga qarshi kurashish davlat siyosatining ustuvor yo‘nalishi ekanligi ta’kidlandi. So‘nggi yillarda mazkur jinoyatga qarshi kurashish, jabrlanganlarni qo‘llab-quvvatlash va chet eldagi o‘zbekistonliklarning huquqiy himoyasini ta’minlash bo‘yicha tizimli ishlar amalga oshirildi.

Zo‘rlik ishlatish, qo‘rqitish yoki odam o‘g‘irlash orqali sodir etilgan odam savdosi uchun jazoni kuchaytirishga alohida e’tibor qaratildi. Bundan tashqari, qonunda homilador ayollarga nisbatan ushbu jinoyatni sodir etgan shaxslar uchun yanada qattiqroq javobgarlik choralari ko‘zda tutilmoqda.

Senatorlar ta’kidlaganidek, ushbu qonunning amalga oshirilishi bunday jinoyatlarning oldini olishga, aybdorlarga adolatli jazo berilishini ta’minlashga hamda ayollar va bolalar huquqlarini himoya qilishni kuchaytirishga xizmat qiladi. Qonun bir ovozdan qo‘llab-quvvatlandi.