Senat majlisida ‘O‘zbekiston Respublikasining ’Davlat boji to‘g‘risida’gi Qonuniga qo‘shimcha va o‘zgartishlar kiritish haqida‘gi qonun ko‘rib chiqildi va ma’qullandi. Ushbu tashabbus sug‘urta xizmatlari iste’molchilarining huquq va manfaatlarini himoya qilishga hamda tadbirkorlik faoliyati uchun qulay sharoitlar yaratishga qaratilgan.

Avvalgi qonunchilikda sug‘urta faoliyatini nazorat qiluvchi organni majburiy sug‘urta bilan bog‘liq ishlar bo‘yicha davlat bojini to‘lashdan ozod etish ko‘zda tutilgan edi. Biroq, bunday imtiyozlar sug‘urtalovchilar, sug‘urtalangan shaxslar va jabrlanuvchilarga tatbiq etilmagan, bu esa sug‘urta kompaniyalariga bo‘lgan ishonchning pasayishiga olib kelgan.

2023-yilda Sug‘urta bozorini rivojlantirish departamentiga ikki mingga yaqin shikoyat kelib tushgan bo‘lib, ularning aksariyati sug‘urta summalari, ayniqsa transport vositalarini majburiy sug‘urtalash bo‘yicha to‘lovlar amalga oshirilmaganligi bilan bog‘liq edi. Fuqarolar ko‘pincha davlat bojini to‘lash zarurati tufayli sudga da’vo qilishdan bosh tortgan, sud rad etgan taqdirda moliyaviy qiyinchiliklarga duch kelishdan xavotirlanishgan.

Qonun sug‘urtalovchilar, sug‘urtalangan shaxslar va jabrlanuvchilarni majburiy sug‘urta bilan bog‘liq da’volar bo‘yicha sudlarda davlat bojini to‘lashdan ozod qiladi. Shuningdek, hujjat ma’muriy-hududiy bo‘linish o‘zgargan taqdirda tadbirkorlar va yuridik shaxslarni qayta ro‘yxatdan o‘tkazish bojini to‘lashdan ozod etishni nazarda tutadi.