Toshkentda Oliy ta’lim, fan va innovatsiyalar vazirligi hay’atining yig‘ilishi bo‘lib o‘tdi. Unda ta’lim sohasini rivojlantirishning muhim masalalari va ekologik tashabbuslar muhokama qilindi.

Ta’lim vaziri Qo‘ng‘irotboy Sharipov atrof-muhitni muhofaza qilish, “yashil” texnologiyalarni joriy etish, suv resurslaridan oqilona foydalanish hamda atrof-muhitni muhofaza qilish va “yashil” iqtisodiyot yili doirasida yashil hududlarni kengaytirish bo‘yicha ustuvor vazifalarni belgilab berdi. Orol fojiasi oqibatlarini yumshatish, chiqindilar muammosini hal etish va aholi salomatligini mustahkamlashga alohida e’tibor qaratildi. Vazir oliy ta’lim muassasalari uchun ekologik barqarorlik va samaradorlikning xalqaro standartlarini inobatga olgan holda «Harakatlar rejasi‘ni ishlab chiqishni topshirdi. Shuningdek, infratuzilmani yaxshilash va GreenMetric kabi xalqaro reytinglarda o‘rin egallash bo‘yicha vazifalar belgilandi.

Muhandislik mutaxassisliklari bo‘yicha dual ta’limni joriy etish masalasi ham ko‘rib chiqildi. 2024/2025 o‘quv yilidan boshlab talabalar uchun 15 haftalik ishlab chiqarish amaliyoti dasturlarini yo‘lga qo‘yish rejalashtirilmoqda. Rektorlarga amaliyotlarni tashkil etish uchun korxonalar bilan shartnomalar tuzish, qo‘shma dasturlar yaratish maqsadida “Top-500” ga kiruvchi xorijiy oliy ta’lim muassasalari bilan hamkorlikni kuchaytirish topshirildi. Bundan tashqari, “Kelajak olimi” tanloviga talabalar va tadqiqotchilarni yanada faolroq jalb etish tavsiya etildi.