2024-жылдын 27-майында Женевада (Швейцария) Бүткүл дүйнөлүк саламаттыкты сактоо ассамблеясынын 77-сессиясы ишин баштады, ага Кыргызстандан саламаттыкты сактоо министри Алымкадыр Бейшеналиев баштаган делегация катышты.
Саламаттыкты сактоо министрлигинин басма сөз кызматынан алынган маалыматка караганда, ассамблеянын кезектеги сессиясында министр А.Бейшеналиев Ишеним грамоталары боюнча комитеттин мүчөсү болуп шайланды. 12 мүчө мамлекеттин өкүлдөрүн камтыган бул комитет мүчө мамлекеттердин жана ассоциацияланган мүчөлөрдүн ишеним грамоталарын кароо үчүн ар бир Дүйнөлүк саламаттык сактоо ассамблеясынын башында түзүлөт.
Кыргызстандан келген делегациянын мындай жогорку деңгээлде катышуусу саламаттыкты сактоо тармагындагы глобалдык кызматташтыктын маанилүүлүгүн жана өлкөнүн бул жаатта эл аралык стандарттарды иштеп чыгууга жана кабыл алууга катышууга умтулуусун баса белгилейт.
Министр Бейшеналиев жана анын делегациясынын Бүткүл дүйнөлүк саламаттыкты сактоо ассамблеясынын 77-сессиясына катышуусу саламаттык сактоонун актуалдуу маселелерин талкуулоого, тажрыйба алмашуу, медициналык жардамдын сапатын жогорулатуу боюнча биргелешкен чечимдерди иштеп чыгуу Кыргызстанда да жана бүткүл дүйнөдө да баалуу салым кошот деп күтүлүүдө.