Ўтган ҳафта Астана шаҳрида ШҲТ га аъзо-давлатлар вазирлик ва идоралари раҳбарларининг экологик масалалар бўйича 5-учрашуви бўлиб ўтди.

Учрашувда Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазири Азиз Абдухакимов ҳам иштирок этди.

Тадбир давомида ШҲТ га аъзо-давлатларнинг атроф-муҳитни муҳофаза қилиш соҳасидаги ҳамкорликнинг бугунги ҳолати ва уни ривожлантириш истиқболлари юзасидан фикр алмашилди. Шунингдек, аъзо-давлатлар ўртасида атроф-муҳитни муҳофаза қилиш соҳасида 2025-2027 йилларга мўлжалланган ҳамкорлик концепциясини амалга ошириш режасини амалга ошириш зарурлиги таъкидланди.

Томонлар 2024 йилда ШҲТ Экология йили бўйича ҳаракатлар режасини янада амалга ошириш масалаларини муҳокама қилдилар.

Учрашув якунида Вазирлар ШҲТ Котибиятига икки муҳим ҳужжатни келгусида кўриб чиқиш учун тақдим этишни тавсия қилдилар. Чиқиндиларни самарали бошқариш бўйича аъзо-давлатлар раҳбарлари Кенгашининг баёноти ва ШҲТ га аъзо-давлатлар ҳукуматлари ўртасида атроф-муҳитни муҳофаза қилиш соҳасида ҳамкорлик тўғрисидаги битим.

Ўзбекистон Республикаси Президенти Шавкат Мирзиёев ташаббуси билан ШҲТ нинг 2024-2026 йилларга мўлжалланган яшил камар дастурини амалга ошириш бўйича қўшма ҳаракатлар режаси тасдиқланди.

Шунингдек, иштирокчилар экологик муаммоларни ҳал этиш бўйича ШҲТ га
аъзо-давлатларнинг Қўшма ёндашувларини, ШҲТ га аъзо-давлатларнинг атроф-муҳитни муҳофаза қилиш соҳасидаги 2025-2027 йилларга мўлжалланган ҳамкорлиги концепциясини амалга ошириш режасини маъқулладилар.

Сурат: ШҲТ матбуот хизмати