O‘zbekistonda 500 nafar rahbarning korrupsiyaga moyilligini baholash ishlari boshlanib ketdi. Korrupsiyaga qarshi kurashish agentligi buyurtmasi asosida Rahbar kadrlarni baholash markazi tomonidan amalga oshirilayotgan ushbu tashabbus davlat xizmatchilarida “halollik immunitetini” shakllantirish va bu borada oldini olish choralarini joriy etishga qaratilgan.

Shuningdek, davlat xizmatchilari orasida korrupsiyaga nisbatan murosasiz munosabat qadriyatlarini shakllantirishga yo‘naltirilgan tadqiqotlarni muntazam ravishda, yiliga kamida bir marta o‘tkazish taklif etilmoqda. Ushbu tadqiqotlar natijalariga asoslanib, korrupsiyaga qarshi kurashni kuchaytirish bo‘yicha takliflar ishlab chiqiladi.

Bundan tashqari, mamlakatda BMTning Korrupsiyaga qarshi konvensiyasi talablari bajarilishini kuzatib borish uchun elektron platforma ishga tushirilishi rejalashtirilgan. Yangi resurs xalqaro tashkilotlarning tavsiyalarini, fuqarolik institutlarining hisobotlarini va xalqaro standartlarning amalga oshirilishi bo‘yicha ma’lumotlarni kuzatib borish imkonini beradi.

Platformani to‘ldirish va yangilab borish uchun idoralararo ishchi guruh tashkil etiladi. Elektron tizim asosiy ma’lumotlar va hisobotlarni joylashtirish imkonini beradi, shuningdek, ma’lumotlarning shaffofligi va keng jamoatchilik uchun ochiqligini ta’minlaydi.