Abu-Dabida jahon yetakchilarining e’tiborini tortgan “Barqaror rivojlanish haftaligi” (ADSW) xalqaro forumi davom etmoqda. Tadbir ishtirokchilari orasida Qozog‘iston va O‘zbekiston prezidentlari so‘zga chiqib, barqaror rivojlanishning muhim masalalarini muhokama qildilar.

Qozog‘iston Prezidenti Qosim-Jomart To‘qayev o‘z nutqida global muammolar, jumladan, tabiiy va geosiyosiy xavf-xatarlarni ta’kidlab, ularni bartaraf etish uchun hamkorlikda harakat qilishga tayyorligini bildirdi. Davlat rahbari Qozog‘istonning raqamlashtirish, infratuzilma va yadro energetikasini rivojlantirishga yo‘naltirilgan strategiyasini taqdim etdi. Shuningdek, u xalqaro hamkorlar respublikada umumiy quvvati 43 GVt bo‘lgan yashil energetika loyihalarini amalga oshirayotganini ma’lum qildi.

Sammitdan oldin To‘qayev BAA Prezidenti shayx Muhammad bin Zoyid Ol Nahyon va Ozarbayjon rahbari Ilhom Aliyev bilan uchrashuvlar o‘tkazib, ikki tomonlama hamkorlik istiqbollarini muhokama qildi.

O‘zbekiston Prezidenti Shavkat Mirziyoyev sammitda so‘zga chiqib, respublikaning 600 GVt quyosh va shamol energiyasi ishlab chiqarish salohiyatini ta’kidladi. U O‘zbekistonning Markaziy Osiyoni “yashil” iqtisodiyot markaziga aylantirish uchun hamkorlikni rivojlantirishga intilayotganini ma’lum qildi.

Tadbir doirasida Mirziyoyev BAA sun’iy intellekt vaziri bilan uchrashib, sun’iy intellekt sohasida hamkorlik qilish muhimligini ta’kidladi. Shuningdek, mamlakatlar o‘rtasidagi hamkorlik rivojlanishi, jumladan iqtisodiyot, energetika, transport, logistika, shaharsozlik, tog‘-kon sanoati va boshqa sohalardagi loyihalar muhokama qilindi.

Tomonlar nodir yer metallarini o‘zlashtirish, temir yo‘l infratuzilmasi va portlarni rivojlantirish, kabel ishlab chiqarish, hamda ta’lim va sog‘liqni saqlash sohalarida davlat-xususiy sheriklik tashabbuslarini amalga oshirishni tezlashtirishga kelishib oldilar. Hamkorlikni yanada mustahkamlash bo‘yicha ‘yo‘l xaritasi‘ni ishlab chiqish to‘g‘risida qaror qabul qilindi.