15-yanvar kuni Toshkentdagi “Taraqqiyot strategiyasi” markazida O‘zbekiston Respublikasi Prezidentining “O‘zbekiston-2030” strategiyasini “Atrof-muhitni muhofaza qilish va “yashil” iqtisodiyot yili‘da amalga oshirishga oid davlat dasturi to‘g‘risida‘gi Farmoni loyihasining jamoatchilik muhokamasi bo‘lib o‘tdi. Tadbir BMTning O‘zbekistondagi Doimiy muvofiqlashtiruvchisi ofisi bilan hamkorlikda tashkil etildi. Muhokamada 200 dan ortiq mutaxassis, jumladan, Senat a’zolari, Oliy Majlis deputatlari, xalqaro tashkilotlar, diplomatik korpus vakillari, shuningdek, davlat organlari rahbarlari va ommaviy axborot vositalari vakillari ishtirok etdilar.

Ekologiya, atrof-muhitni muhofaza qilish va iqlim o‘zgarishi vazirining o‘rinbosari Iskandar Qutbiddinov Farmon loyihasida taklif etilayotgan chora-tadbirlar haqida ma’lumot berdi. Bular qatoriga atmosfera havosini muhofaza qilish, ekologik sug‘urta, plastik chiqindilarni kamaytirish va “yashil tadbirkor” maqomini joriy etish kiradi. Uning ta’kidlashicha, loyihaning asosiy maqsadi dolzarb ekologik muammolarni hal etish, ifloslanishning oldini olish, iqlim o‘zgarishiga moslashish va fuqarolar uchun qulay tabiiy muhit yaratishdan iborat.

Shuningdek, muhokama davomida O‘zbekiston so‘nggi yillarda mamlakatni rivojlantirish bilan bog‘liq strategik hujjatlarni tayyorlashda keng jamoatchilik va xorijiy mutaxassislar fikrini faol jalb etayotgani qayd etildi. Ushbu tadbir ekologik vaziyatni yaxshilash va barqaror rivojlanishga qaratilgan keng qamrovli dasturni shakllantirish yo‘lidagi muhim qadam bo‘ldi.

‘Davlat dasturi to‘g‘risida‘gi Farmon loyihasi 2025-yilga mo‘ljallangan 295 ta amaliy chora-tadbir, 87 ta me’yoriy hujjat va 269 ta maqsadli ko‘rsatkichni o‘z ichiga oladi. Dastur hozirda “O‘zbekiston-2030” xalq strategiyasi internet-portalida muhokama qilish uchun taqdim etilgan.