O‘zbekistonning qo‘riqlanadigan tabiiy hududlarida ajoyib qishki gullashlar kuzatildi. Qo‘riqxona va tabiat bog‘lari xodimlari sovuq sharoitda ochilgan noyob turlarni suratga olishdi. Surxon davlat qo‘riqxonasi va “Yuqori To‘palang” milliy tabiat bog‘ida qayd etilgan Korolkov za’faroni, Kesselring bo‘tako‘zi va dorivor qoqio‘t shular jumlasidandir.

O‘zbekiston Qizil kitobiga kiritilgan Kesselring bo‘tako‘zi Markaziy Osiyoda endemik tur hisoblanadi. Bu noyob gul tog‘larning toshloq va shag‘alli yonbag‘irlarida, tog‘ etaklaridan to yuqori mintaqalarigacha cheklangan miqdorda uchraydi. Uning soni asta-sekin kamayib bormoqda, bu esa turni saqlab qolishga alohida e’tibor qaratishni talab etadi.

Korolkov za’faroni ham Markaziy Osiyodagi kamyob endemik turlar qatoriga kiradi. Uning gul ichida joylashgan qizil changdonlari oshpazlikda ham, tibbiyotda ham qadrlanadigan ziravor manbai hisoblanadi. O‘simlik mayda tuproqli yonbag‘irlarda o‘sishni afzal ko‘radi va himoyaga muhtoj bo‘lgan tabiiy boylikning yana bir namunasidir.