O‘zbekistonning 32 ta shahar va tumanida ekologik vaziyatni yaxshilash hamda sog‘lom turmush tarzini ommalashtirish maqsadida “Soyali sayr ko‘chalari” tarmog‘ini yaratish rejalashtirilmoqda. “O‘zbekiston-2030” strategiyasini Atrof-muhitni muhofaza qilish va “yashil iqtisodiyot” yilida amalga oshirishga oid davlat dasturi to‘g‘risidagi Prezident Farmoni loyihasiga ko‘ra, ko‘kalamzorlashtirish maydonlari 14,1 foizgacha kengaytiriladi, qirg‘oq bo‘yi hududlarida 80 ta infratuzilma obyekti quriladi va 110 kilometrdan ziyod sayr yo‘laklari barpo etiladi.

Yashil hududlar nafaqat ekologik jihatdan, balki aholining ruhiy salomatligi uchun ham muhim ahamiyatga ega. Xitoyning Xuachjun universiteti olimlari o‘tkazgan tadqiqotlar shuni ko‘rsatadiki, yashil hududlarda muntazam ravishda bo‘lish depressiya va tashvish holatlarining xavfini kamaytiradi.

Xalqaro tajriba ham shunday tashabbuslarning nechog‘lik muhimligini tasdiqlaydi. Misol uchun, Parijda betonlashtirilgan hududlarni yashil maydonlarga aylantirish maqsadida “Ko‘proq tabiat, kamroq beton” kampaniyasi muvaffaqiyatli amalga oshirilmoqda. Jumladan, shahar markazidagi binolardan birining betonlangan maydoni 2020-yilga kelib butunlay yashil vohaga aylantirildi.

O‘zbekistonda “Soyali sayr ko‘chalari” tarmog‘ini joriy etish loyihasi 2025-2027 yillarga mo‘ljallangan. Bu loyiha gavjum ko‘chalarda havo ifloslanishini 5-10 foizga kamaytirish va yo‘laklar bo‘ylab havo haroratini 3-5 darajaga pasaytirish imkonini beradi. Bundan tashqari, mazkur loyiha aholining jismoniy faolligini oshirish va sog‘lom turmush tarzi uchun qulay sharoitlar yaratishga xizmat qiladi.