Prezident Shavkat Mirziyoyev O‘zbekistonda kambag‘allikni kamaytirish va aholini ish bilan ta’minlash bo‘yicha yangi tashabbuslarga e’tibor qaratdi. 2025-yilgacha 5,2 million fuqaroni ish bilan ta’minlash, 1,5 million kishini kambag‘allikdan chiqarish rejalashtirilmoqda. Ilk bor 60 ta tuman va shahar kambag‘allik va ishsizlikdan xoli hududlarga aylantiriladi.

Kam ta’minlangan fuqarolarga alohida e’tibor beriladi: 123 ta tumanda ular 20 ming gektar maydonda daraxt ekish va dorivor o‘simliklar yetishtirish ishlariga jalb etiladi. Ekilgan har 100 ta daraxt uchun 375 ming so‘m miqdorida subsidiya to‘lanadi. 300 ta murakkab mahallada quyosh elektr stansiyalari qurilib, kam ta’minlangan oila a’zolarini ish bilan ta’minlaydi.

Sayyohlik hududlarida mehmonxonalar va kafelar ochish, shuningdek, pochta bo‘limlari qoshida elektron tijorat markazlarini tashkil etish rejalashtirilgan bo‘lib, bu ham ehtiyojmandlar uchun ish o‘rinlarini yaratadi. Mamlakatimiz bo‘ylab jami 6472 ta mahallada 210 ming aholini kambag‘allikdan chiqarishga qaratilgan loyihalar amalga oshiriladi.

Kichik biznesni qo‘llab-quvvatlash uchun 120 trillion so‘m miqdorida kredit ajratiladi. Mahalla bankirlari bilan hamkorlikda 1,5 million aholi uchun doimiy ish o‘rinlari yaratish, 2 milliondan ortiq fuqaroni tadbirkorlikka jalb etish ko‘zda tutilgan.