O‘zbekistonning Qirg‘izistondagi Bosh konsulxonasi iqtisodiy hamkorlikni kengaytirish va o‘zbek mahsulotlari eksportini ko‘paytirish maqsadida Toshkentdagi “Lumiflex” MCHJ korxonasi vakili Bahrom To‘lag‘onovning Qirg‘iziston hududlariga tashrifi tashabbusini ilgari surdi.

2020-yilda tashkil etilgan “Lumiflex” kompaniyasi qadoqlash materiallari ishlab chiqarishga ixtisoslashgan bo‘lib, Markaziy Osiyoda bu turdagi yagona korxona hisoblanadi. Zavodda Ispaniyaning zamonaviy uskunalari qo‘llaniladi, bu esa yuqori sifatli mahsulotlar ishlab chiqarilishini ta’minlaydi.

Botken viloyatidagi Qizil-Qiya shahrida O‘zbekiston yoshlari butunjahon assotsiatsiyasining Qirg‘izistondagi vakili Boburmirzo Abdusamadov ko‘magida “Bio Milk”, “Murodjon ISE”, “777 Muzqaymoq”, “Jeti Batir” va “BARBOL” kabi bir qator mahalliy kompaniyalar bilan muzokaralar o‘tkazildi. Uchrashuv yakunida taxminan 1 million AQSh dollari miqdoridagi eksport shartnomalarini tuzish bo‘yicha kelishuvlarga erishildi.