YUNESKO qarorgohida O‘zbekiston Madaniyat va san’atni rivojlantirish jamg‘armasi raisi Gayane Umerova, O‘zbekistonning YUNESKOdagi doimiy vakili Kamol Muxtarov hamda YUNESKOning gender tenglik masalalari bo‘yicha direktori Begonya Lasagabaster ishtirokida uchrashuv bo‘lib o‘tdi. Muhokamaning asosiy mavzusi ayollarni qo‘llab-quvvatlashda hamkorlikni mustahkamlash, ularning madaniyat, ta’lim va ijtimoiy loyihalardagi o‘rnini kuchaytirish bo‘ldi.

O‘zbekiston delegatsiyasi “O‘zbekiston-2030” strategiyasi doirasida ishlab chiqilgan, madaniyat, san’at va raqamli texnologiyalar sohalarida ayollarga ko‘maklashishga qaratilgan tashabbuslarni taqdim etdi. Ayniqsa, ijodiy sohalarda ayollar yetakchiligini rivojlantirish, raqamli muhitda ayollarning ishtiroki va madaniyat sohasida ularning kasbiy o‘sishi bilan bog‘liq loyihalarga alohida e’tibor qaratildi.

Uchrashuvda Samarqandda bo‘lib o‘tadigan YUNESKO Bosh konferensiyasining 43-sessiyasi doirasida maxsus tadbir tashkil etish istiqbollari ham muhokama qilindi.