Qoraqalpog‘istonda joylashgan Quyi Amudaryo davlat biosfera qo‘riqxonasining fotoqopqoni biotexnik tadbirlardan so‘ng qoldirilgan ozuqadan bahramand bo‘layotgan Buxoro bug‘ularini qayd etdi. Bu tasvirlar qish mavsumida yovvoyi hayvonlarga yordam berish maqsadida amalga oshirilgan harakatlarning natijasi hisoblanadi.

Qo‘riqxona 2011-yilda tashkil etilgan bo‘lib, Qoraqalpog‘iston Respublikasining Beruniy va Amudaryo tumanlari hududlarini o‘z ichiga oladi. Uning keng maydonlarida 36 turdagi hayvonlar yashaydi, ulardan 4 tasi kam uchraydigan turlar hisoblanadi. Shunday noyob turlardan biri Buxoro bug‘usi yoki xongul bo‘lib, u O‘zbekiston Qizil kitobiga yo‘qolib ketish xavfi ostidagi kenja tur sifatida kiritilgan, shuningdek, SITES va Bonn konvensiyasi kabi xalqaro shartnomalar bilan ham muhofaza qilinadi.

Qo‘riqxona hududida ekotizimni saqlash va qish mavsumida yovvoyi hayvonlarning ozuqa topishini osonlashtirish maqsadida biotexnik tadbirlar o‘tkazilmoqda. Jumladan, 28 ta Buxoro bug‘usiga kuniga 2 kilogrammdan ozuqa va 10 kilogrammdan dag‘al pichan berilmoqda.