Misrning “Sada al-Balad” axborot agentligi xalqaro munosabatlarni rivojlantirishda madaniy diplomatiyaning o‘rniga bag‘ishlangan maqolani e’lon qildi. Maqolada ta’kidlanishicha, O‘zbekiston madaniy diplomatiyaga katta e’tibor qaratib, uni boshqa mamlakatlar bilan aloqalarni mustahkamlashning muhim vositasi sifatida ko‘rmoqda.
Prezident Shavkat Mirziyoyev o‘z faoliyatini boshlaganidan buyon xorijiy davlatlar bilan hamkorlikni rivojlantirishga ustuvor ahamiyat berib kelmoqda. O‘zbekistonning bu boradagi amaliy qadamlari jahon hamjamiyati tomonidan yuqori baholanayotgani xalqaro ekspertlar va siyosiy arboblarning ijobiy fikr-mulohazalarida aks etmoqda.
O‘zbekiston madaniy diplomatiyasi mamlakatning noyob tarixiy merosiga asoslanadi. Prezident tashriflari doirasida imzolangan bitimlar hamkor mamlakatlarda ‘O‘zbekiston madaniyati kunlari‘ni o‘tkazishga xizmat qildi. 2017-2020-yillarda bunday tadbirlar 20 ta davlatda o‘tkazilgan bo‘lsa, 2021-2024-yillarda ularning soni 40 taga yetdi.
Madaniy hamkorlikni rivojlantirishda O‘zbekistonning xalqaro tashkilotlar bilan hamkorlik doirasidagi tashabbuslari alohida ahamiyat kasb etmoqda. Bugungi kunga qadar mamlakat madaniyat, fan va ta’lim sohalarida 100 dan ortiq bitimlarni ratifikatsiya qilgan. Ushbu bitimlarning asosiy maqsadi O‘zbekistonning boy badiiy va madaniy merosini xorijda ommalashtirishdan iborat.
Xalqaro festivallar va ijodiy jamoalarning gastrollari mamlakat madaniy diplomatiyasining muhim qismiga aylandi. 2024-yilda 28 ta xorijiy gastrollar tashkil etildi, jumladan, Xivada “Lazgi” xalqaro raqs festivali, Buxoroda zardo‘zlik va zargarlik san’ati festivali, Namanganda gullar festivali, Samarqandda “Sharq taronalari” musiqa forumi kabi muhim tadbirlar o‘tkazildi.
O‘zbekistonning madaniy hamkorligi Yaqin Sharq mamlakatlariga ham faol yoyilmoqda. 2021-yilda Dubayda Milliy simfonik orkestr va Alisher Navoiy nomidagi Davlat akademik katta teatri o‘z dasturlarini muvaffaqiyatli namoyish etdi. Ushbu tashabbuslar xalqlar o‘rtasidagi aloqalarni mustahkamlash va do‘stona munosabatlarni rivojlantirishga xizmat qilmoqda.
Madaniyat va san’atni rivojlantirish jamg‘armasi madaniy diplomatiyani rivojlantirishga salmoqli hissa qo‘shmoqda. Jamg‘arma tomonidan 2021-yildan 2024-yilgacha Milan, Parij, Berlin, Pekin va Boku kabi shaharlarda 26 ta xalqaro tadbir tashkil etildi.