O‘zbekiston elchisi Sardor Rustamboyev Dehli gubernatori Vinay Kumar Saksena bilan uchrashuv o‘tkazdi. Uchrashuvda tomonlar ikki davlat o‘rtasidagi aloqalarni mustahkamlash masalalarini ko‘rib chiqdilar. So‘nggi yillarda O‘zbekiston va Hindiston xalqlari o‘rtasidagi tarixan do‘stona munosabatlar yangi mazmun bilan boyib, jadal rivojlanayotgani ta’kidlandi.

Uchrashuvda mintaqalararo hamkorlik istiqbollariga, xususan, Toshkent va Dehli ishbilarmon, ilmiy va madaniy doiralari vakillarining o‘zaro hamkorligiga alohida e’tibor qaratildi. Tomonlar shahar boshqaruvi sohasida tajriba almashish, hududlarni obodonlashtirish va aholi uchun qulay infratuzilma yaratishning muhimligini ta’kidladilar.

Uchrashuv davomida Dehlida “O‘zbekiston” bog‘ini barpo etish va buyuk o‘zbek mutafakkiri Alisher Navoiy haykalini o‘rnatish bo‘yicha takliflar muhokama qilindi. Gubernator ushbu tashabbuslarni qo‘llab-quvvatlashini va ularni amalga oshirish uchun hamkorlikda ishlashga tayyorligini bildirdi.

Shuningdek, Toshkent shahar hokimligi va Dehli ma’muriyati o‘rtasida delegatsiyalar almashish, ilm-fan, madaniyat, turizm va sport sohalarida qo‘shma loyihalarni ishlab chiqish, hamda hamkorlikni mustahkamlashga xizmat qiluvchi tadbirlarni tashkil etish rejalari ko‘rib chiqildi.