2025-yil 1-fevraldan boshlab Saudiya Arabistoniga sayohat qilish, jumladan Haj va Umra ziyoratlarini ado etish uchun meningitga qarshi emlanganlik to‘g‘risidagi guvohnomani ko‘rsatish shart bo‘ladi. Yangi talab ikki yoshdan yuqori bo‘lgan barcha sayohatchilarga taalluqli.
Emlash parvozdan kamida 10 kun oldin amalga oshirilishi lozim. Ushbu majburiy shart yuqumli kasalliklar tarqalishining oldini olish va ziyoratchilar salomatligini himoya qilish maqsadida joriy etilgan.
Meningit — infeksiya tufayli bosh va orqa miya pardalarining xavfli yallig‘lanishi hisoblanadi. Bu kasallik o‘limga olib kelishi mumkin va zudlik bilan davolanishni talab qiladi. Uning qo‘zg‘atuvchilari odamdan odamga yuqadigan bakteriyalar, viruslar, zamburug‘lar va parazitlardir. Mazkur infeksiya har qanday yoshdagi odamlarda kuzatilishi mumkin.