Parijda O‘zbekistonning Fransiyadagi elchisi Nodir G‘aniyev Fransiya Mehnat, sog‘liqni saqlash, birdamlik va oila vazirligining Yevropa va xalqaro ishlar bo‘yicha boshqarmasi direktor o‘rinbosari Jerom Vaynbax bilan uchrashdi. Muzokaralarda sog‘liqni saqlash sohasidagi ikki tomonlama hamkorlik istiqbollari muhokama etildi, deb xabar bermoqda “Dunyo” axborot agentligi.

Tomonlar ikki mamlakat tegishli idoralari o‘rtasidagi hamkorlikni kengaytirish uchun sezilarli imkoniyatlar mavjudligini ta’kidladilar. Uchrashuvning asosiy natijalaridan biri sog‘liqni saqlash sohasidagi hamkorlikning asosiy yo‘nalishlarini qamrab oladigan deklaratsiyani tayyorlash bo‘yicha kelishuvga erishilgani bo‘ldi.

O‘zbek tibbiyot mutaxassislarini Fransiyada tayyorlash masalalariga alohida e’tibor qaratildi. O‘zbekistonlik kadrlar uchun qisqa muddatli malaka oshirish kurslari va maxsus treninglarni tashkil etish rejalashtirilmoqda.

Ijtimoiy himoya sohasidagi qo‘shma loyihalar ham muhokama qilindi. Ikki mamlakat vakillari O‘zbekiston Prezidenti huzuridagi Ijtimoiy himoya agentligi va Fransiya vazirligi o‘rtasida kelishuv tuzishga qiziqish bildirdilar.