Farg‘ona viloyati ma’muriyati vakillari va tadbirkorlardan iborat O‘zbekiston delegatsiyasi ikki mamlakat o‘rtasidagi ishbilarmonlik va iqtisodiy aloqalarni mustahkamlash maqsadida Gomel, Bobruysk va Minsk shaharlarini ziyorat qildi.

Gomelda O‘zbekiston delegatsiyasini Ijroiya qo‘mitasi raisi Ivan Krupko kutib oldi. Uchrashuvda turli sohalardagi hamkorlik istiqbollari, jumladan, Gomel va Farg‘onada milliy savdo uylarini tashkil etish masalalari muhokama etildi.

Tashrifning eng muhim voqealaridan biri Gomel viloyati Savdo-sanoat palatasida o‘tkazilgan biznes-forum bo‘lib, unda B2B formatidagi muzokaralar amalga oshirildi.

Bobruyskda delegatsiya a’zolari mahalliy ijroiya qo‘mitasi raisi Igor Kisel bilan uchrashdi. Go‘sht-sut va qandolatchilik, to‘qimachilik, mebelchilik va mini-traktor ishlab chiqarish kabi sohalarda qo‘shma loyihalarni amalga oshirish imkoniyatlariga alohida e’tibor qaratildi. Delegatsiya a’zolari shuningdek, mintaqadagi yirik korxonalarga tashrif buyurishdi va “Belagroprombank” binosida tashkil etilgan ishbilarmonlik uchrashuvlarida qatnashdilar.

Minskda delegatsiya Belarus Tashqi ishlar vazirligining Marketing va narx konyunkturasi milliy markazi bilan hamkorlikda O‘zbekiston-Belarus biznes-forumini o‘tkazdi. Tadbirda Farg‘ona viloyatining investitsiyaviy, sayyohlik va axborot-texnologik salohiyati namoyish etildi.

Tashrif yakunida umumiy qiymati 4,5 million AQSh dollariga teng bo‘lgan 10 ta shartnoma, bitim va memorandumlar imzolandi.