Қазақстан Үкіметінде республикада тамақ және қайта өңдеу саласын дамыту мәселесі қаралды. Қазақстан Республикасының Ауыл шаруашылығы министрі Айдарбек Сапаров егжей-тегжейлі баяндама жасады.

Қолда бар деректер бойынша 2023 жылы тамақ өнімдерін өндіру көлемінің 1,8% — ға өсуі тіркелді, бұл 3,1 трлн теңгені құрады. Азық-түлік өндірісіне салынған инвестиция көлемі де 7,1% — ға өсіп, 151 млрд теңгені құрады.

«Ауыл шаруашылығы өнімдерін қайта өңдеу саласында жалпы сомасы 119 млрд теңгеге 48 инвестициялық жоба іске асырылды. Өсімдік шаруашылығы өнімдерін өңдеуде 3 негізгі бағытты бөлуге болады-дәнді және майлы дақылдарды өңдеу, сондай-ақ қант өндірісі. Ұн өндірісі 3,2 млн тоннаны құрады, бұл елдің ішкі тұтынуынан 2 есе артық. Бұл ретте Қазақстан экспорттық жеткізілім көлемі бойынша әлемде жетекші орындардың бірін алады», — деп атап өтті А.Сапаров.