Россиядагы кыргызстандыктарга легалдаштыруунун тартиби түшүндүрүлүүдө – ИА Караван Инфо
Россиядагы кыргызстандыктарга легалдаштыруунун тартиби түшүндүрүлүүдө

Россиядагы кыргызстандыктарга легалдаштыруунун тартиби түшүндүрүлүүдө, деп кабарлайт КРнын Эмгек, социалдык камсыздоо жана миграция министрлигинин басма сөз кызматы. 

Маалыматка ылайык, 2024-жылдын 30-декабрында Россияда чет өлкөлүк жарандарга, анын ичинде Россия Федерациясынын аймагында мыйзамсыз жүргөн Кыргыз Республикасынын жарандарына 2025-жылдын 1январынан 30-апрелине чейинки мезгилде өзүнүн укуктук статусун жөнгө салуу мүмкүнчүлүгүн берген РФ президентинин жарлыгына кол коюлган.

Ушуга байланыштуу Кыргыз Республикасынын Эмгек, социалдык камсыздоо жана миграция министрлигинин Россия Федерациясындагы Өкүлчүлүгү Россияда мыйзамсыз жүргөн Кыргыз Республикасынын жарандарын маалымдоо боюнча ишти активдештирди. Кыргызстандыктар массалык түрдө жашаган жерлерге баруу жана диаспоралык уюмдар менен жолугушуу графигин камтыган атайын план иштелип чыкты. Бул иш — чаралардын негизги максаты-мыйзамдаштыруу жана укуктук статусту жөнгө салуу тартибин түшүндүрүү.

Жарандардын ыңгайлуулугу үчүн эскертмелер даярдалып, популярдуу WhatsApp жана Telegram группаларда жайгаштырылды.

Эскертүүлөр мыйзамдаштыруу үчүн зарыл болгон кадамдар, Россия мыйзамдарында белгиленген мөөнөттөр жана талаптар жөнүндө маалыматтарды камтыйт.

Жакынкы арада Россиянын ыйгарым укуктуу органдары менен жолугушуулар пландаштырылып, анда Россиянын Президентинин Жарлыгын ишке ашыруунун негизги маселелерин талкуулоо жана мыйзамдаштыруу жол-жобосун тактоо пландаштырылууда.

КР Эмгек, социалдык камсыздоо жана миграция министрлигинин Россия Федерациясындагы өкүлчүлүгү Россияда жүрүүсүн мыйзамдаштырууну каалаган жарандарга колдоо көрсөтүүнү улантууда.

Ақпарат көзі: сайт https://caravan-info.kg/

error: