O‘zbekiston Raqobatni rivojlantirish va iste’molchilar huquqlarini himoya qilish qo‘mitasi 2024-yilda 36 mingta reklama e’lonini tekshirib, ularning 14 mingtasida qoidabuzarliklar aniqlaganini idora matbuot xizmati xabar qildi.

Tekshiruvlar natijasida 112 ta kompaniyaga jami 2,6 milliard so‘m miqdorida jarima solindi. Bundan tashqari, aniqlangan qoidabuzarliklarni bartaraf etish talabi bilan 5,4 mingga yaqin ogohlantirish berildi.

Internet-reklamaga alohida e’tibor qaratildi: bir yil davomida qo‘mita bukmekerlik kompaniyalarining tarmoqqa joylashtirilgan 274 ta e’lonini blokladi. Shuningdek, 26 mingta tashqi reklama obyekti, 6,5 mingta internet e’loni, televideniyeda 563 ta, radioda 367 ta va bosma nashrlarda 305 ta e’lon tekshiruvdan o‘tkazildi.

Qonunga muvofiq, reklama materiallari belgilangan talablarga javob berishi shart. Bu talablarga davlat tilidan foydalanish, iste’molchilarni yolg‘on ma’lumotlar bilan chalg‘itmaslik hamda kamsitish yoki qonunni buzishga undashga yo‘l qo‘ymaslik kiradi.