Bo‘stonliq tumanida 22-yanvar kuni ishga tushgan yangi “Chinorkent” temir yo‘l bekati qurilishi nihoyasiga yetdi. Mazkur loyiha mintaqada turizmni rivojlantirish hamda sayyohlar va mahalliy aholi uchun transport qulayligini oshirishda muhim qadam bo‘ldi.

“Chinorkent” bekati “O‘zbekiston temir yo‘llari” AJning temir yo‘l infratuzilmasini kengaytirish tashabbusi doirasida barpo etildi. Uni qurish uchun Xo‘jakentni Chinorkent bilan bog‘laydigan 1,5 kilometr uzunlikdagi yangi yo‘l yotqizildi.

Bekatda 150 metrlik perron himoyalovchi soyabon bilan jihozlangan, imkoniyati cheklangan yo‘lovchilar uchun qulaylik yaratish maqsadida sirpanishga qarshi plitalar o‘rnatilgan. Shuningdek, bekat hududida xavfsiz harakatlanishni ta’minlaydigan yer osti yo‘lagi qurilgan.

Qurilish ishlari 2024-yil dekabr oyida Toshkent — Xo‘jakent yo‘nalishida elektropoyezd ishga tushirilgandan so‘ng boshlanib, qisqa muddatda yakuniga yetkazildi.