Andijon viloyatining Paxtaobod tumanida 300 million dollar qiymatidagi to‘qimachilik sanoat hududi qurilishiga start berildi. Loyiha “Hayotbaxsh” mahallasidagi 55 gektar maydonni o‘z ichiga olmoqda.

Mazkur hududning tashkil etilishi viloyatda to‘qimachilik sanoatini rivojlantirishda muhim qadam bo‘ladi. Zamonaviy texnologiyalar va infratuzilmani joriy etish orqali ishlab chiqarish quvvatlarini sezilarli darajada oshirish ko‘zda tutilgan. Bundan tashqari, loyiha doirasida 10 mingta yangi ish o‘rni yaratilishi rejalashtirilgan bo‘lib, bu tumanning ijtimoiy va iqtisodiy barqarorligiga jiddiy turtki beradi.

Savdo-sanoat palatasi tadbirkorlarga to‘qimachilik hududidan sanoat ipotekasi asosida foydalanishni taklif etmoqda, bu esa biznes uchun qulay sharoit yaratadi. Qurilishning birinchi bosqichi keyingi ikki oy ichida yakunlanishi, asosiy quvvatlar esa yaqin kelajakda ishga tushirilishi kutilmoqda.