Қирғизистон Республикаси Вазирлар Маҳкамаси раисининг биринчи ўринбосари Адылбек Касымалиев 27-Петербург халқаро иқтисодий форумида иштирок этди.

A.Касымалиев Қирғизистон-Россия ишбилармонлик мулоқоти доирасида ўз нутқида икки мамлакат ўртасидаги савдо-иқтисодий ҳамкорлик ривожланишининг ижобий динамикаси ҳақида гапирди. Унинг таъкидлашича, сўнгги йилларда Россия ва Қирғизистон ўртасидаги ўртача савдо айланмаси 3 миллиард долларни ташкил этди.

«Албатта, бу кўрсаткичлар Қирғизистон ва Россия ўртасидаги савдо-иқтисодий ҳамкорлик, шу жумладан минтақалараро ҳамкорлик натижасидир. Биргаликдаги саъй-ҳаракатларимиз туфайли Россиянинг Қирғизистон иқтисодиётига тўғридан-тўғри инвестициялари бўйича ҳам ижобий динамика кузатилмоқда», — деди Адылбек Касымалиев.

Шунингдек, иштирокчилар савдо-иқтисодий, илмий-техникавий ва гуманитар ҳамкорлик бўйича ҳукуматлараро комиссия, Қирғизистон-Россия минтақалараро конференцияси, Россия-Қирғизистон тараққиёт жамғармаси ва Қирғизистон-Россия ишбилармонлар Кенгашининг самарали ишларини қайд этдилар.

Қирғизистон Республикаси Вазирлар Маҳкамаси раисининг биринчи ўринбосари Россия Федерацияси билан барча соҳаларда ҳамкорликни ривожлантириш ва инновацион лойиҳаларни амалга оширишга тайёрлигини таъкидлади. Савдо-иқтисодий алоқаларни чуқурлаштириш ва диверсификация қилишда икки мамлакат ишбилармон доиралари ва бизнесининг ўрни алоҳида қайд этилди.

Тадбир якунлари бўйича иштирокчилар Қирғизистон-Россия ишбилармонлик мулоқоти Россия ва Қирғизистон ўртасидаги кўп қиррали иқтисодий ҳамкорликни жадал ривожлантириш ва мустаҳкамлаш масалаларини муҳокама қилиш учун анъанавий майдонга айланиб бораётганига келишиб олдилар. 

Сурат: Қирғизистон Республикаси Вазирлар Маҳкамасининг расмий веб-сайти