Биринчи июн куни кечқурун тўрт кунлик расмий ташриф билан Мўғулистонга келган Беларусь Президенти Aлександр Лукашенконинг биринчи рақамли борти бўлган самолёт Чингизхон халқаро аэропортига қўнди. Бу ҳақда Беларусь телеграф агентлиги (БЕЛТА) хабар бермоқда.  

Белоруссия делегацияси, шу жумладан ҳукумат аъзолари, корхоналар, ташкилотлар ва ишбилармон доиралар раҳбарлари аллақачон Мўғулистонда бўлиб, мўғулистонлик ҳамкасблари билан музокаралар олиб бормоқда.

Икки давлат раҳбарларининг расмий музокаралари ҳам тор, ҳам кенгайтирилган форматда бўлиб ўтади. Томонлар Беларусь-Мўғулистон муносабатларининг салоҳиятини максимал даражада ошириш, шу жумладан савдо-иқтисодий ҳамкорлик, корхоналардан маҳсулот етказиб бериш ва қишлоқ хўжалигида биргаликда ишлаш бўйича ҳамкорликнинг истиқболли йўналишларини муҳокама қилишни режалаштирмоқдалар.

Томонлар икки томонлама ҳамкорлик асосларини мустаҳкамловчи бир қатор ҳужжатларни тузишлари кутилмоқда. Бундан ташқари, ташриф давомида Мўғулистон-Белоруссия бизнес-форуми бўлиб ўтади, унда ишбилармон доиралар ҳамкорлик имкониятлари ва аниқ лойиҳаларни муҳокама қиладилар.

Сурат: belta.by