Бу ҳафта Британия Ташқи ишлар вазири Дэвид Кэмерон Тожикистондаги энг йирик “Нурек ГЭС” га ташриф буюрди.

«Тожикистон Республикасида бўлиш жуда жозибали. Буюк Британиянинг Ташқи ишлар, Ҳамдўстлик ва тараққиёт вазири сизнинг мамлакатингизга узоқ вақтдан бери биринчи марта келиши ва бу ерда бўлиш мен учун катта шарафдир. Биз Сизнинг Президентингиз (изоҳ Имомали Раҳмон) билан жуда самарали учрашув ўтказдик. Биз савдо алоқаларини ривожлантириш, яшил энергия ишлаб чиқаришда ҳамкорлик қилиш, яшил иқтисодиётга ўтиш ва рақамли иқтисодиётни ривожлантириш билан боғлиқ лойиҳаларни амалга оширишда қандай ишлашимиз мумкинлиги ҳақида суҳбатлашдик», — деди Дэвид Кэмерон.

Британия Ташқи ишлар вазирининг сўзларига кўра, йирик экологик лойиҳаларда, шунингдек, сиёсий, иқтисодий, тижорат, маданий ва гуманитар масалаларда ҳамкорликни кенгайтириш имконияти мавжуд.

Учрашувда томонлар кичик бизнесни қўллаб-қувватлаш учун инвестиция фондини яратиш, Тожикистонга иқлимни ривожлантириш соҳасида инвестицияларни жалб қилиш ва инглиз тилини ўрганишда ёрдам бериш масалаларини муҳокама қилдилар.

«Биз Тожикистон Республикаси билан яшил иқтисодиёт, яшил молия ва иқлим соҳасидаги ҳамкорлик юқори даражада бўлиши кераклигига аминмиз. Иқлим ўзгариши қийин бўлган вазиятда Нурек ГЭС каби йирик лойиҳалар кўмирдан фойдаланишни камайтириш ва иссиқхона газлари чиқиндиларини камайтириш мақсадида тоза энергия, шу жумладан Марказий Осиёдан Жанубий Осиёга етказиб беришда муҳим рол ўйнайди. Биз бундай лойиҳалар, айниқса CАSА-1000 каби лойиҳалар кўпроқ бўлишини истаймиз, чунки у орқали Марказий Осиё энергияни Жанубий Осиёга ўтказишга ёрдам беради», — деди Д.Кэмерон.

Расм: НИАТ «Ховар»