Қазақстан Премьер-Министрінің орынбасары – Ұлттық экономика министрі Нұрлан Байбазаров Дүниежүзілік банк тобына кіретін Халықаралық қаржы корпорациясының (IFC) сектораралық шешімдер жөніндегі вице-президенті Эммануэль Ньиджиринкиндримен кездесті.

Кездесу барысында Қазақстанда, оның ішінде мемлекеттік-жекешелік әріптестік тетігі шеңберінде инвестициялар тарту және ірі инфрақұрылымдық жобаларды іске асыру мәселелері қаралды.

«Әріптестік жылдарында біз одан әрі дамытуды көздейтін экономикалық мәселелердің кең ауқымын қозғайтын өзара тиімді ынтымақтастықты құра алдық. Атап айтқанда, біз өз мамандарымызды инфрақұрылымдық жобалар және арнайы қорлар құру саласындағы халықаралық IFC сертификаттарымен оқыту және сертификаттау мүмкіндігіне мүдделіміз», — деді Н. Байбазаров.

Сондай-ақ, вице-премьер корпорацияның қаржылық қолдауымен іске асырылатын жобалар Қазақстанның тұрақты дамуы мен экономикалық өсуін қолдауда шешуші рөл атқаратынын атап өтті.

Өз тарапынан,  Эммануэль Ньиджиринкиндри халықаралық қаржы корпорациясы Қазақстанның әлеуетін атап өтіп, оның басым даму бағыттарын қолдауды жалғастыратынын айтты.

Кездесу қорытындысы бойынша IFC өкілдері елдің тұрақты өсуі мақсатында өршіл мемлекеттік-жекешелік әріптестік жобаларын табысты іске асыруға жәрдемдесу үшін халықаралық тәжірибе мен ресурстар ұсынуға дайын екендіктерін білдірді.

Фото: Қазақстан Республикасы Премьер-Министрінің ресми ақпараттық ресурсы