Душанбе, 02 октябр, — АИ «Корвон Иттилоот». Дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ иҷлосияи сеюми Маҷлиси миллии Маҷлиси Олии Ҷумҳурии Тоҷикистон, даъвати ҳафтум баргузор гардид.

Имрӯз аъзои Маҷлиси миллӣ дар оғози иҷлосия тартиби кор, интихоби котибот ва рӯзномаи иҷлосияро қабул карданд, ки иборат аз 42 масъала буд.

Дар ҷараёни муҳокимаи масъалаҳои рӯзнома раисони кумитаҳои Маҷлиси миллӣ хулосаҳои соҳавиро оид ба қонунҳои баррасишаванда пешниҳод намуданд.

 Кумитаҳо масоили конститутсионӣ, ҳуқуқ ва озодиҳои инсон, масъалаҳои аграрӣ, шуғли аҳолӣ, экология, иҷтимоъ, ҳифзи сиҳатӣ, маориф, фарҳанг, сиёсати ҷавонон ва занон, иқтисодиёт ва коммуникатсия ва ҳамоҳангсозии фаъолияти Маҷлиси миллӣ бо мақомоти иҷроия ва воситаҳои ахбори оммаро баррасӣ карданд.

Тибқи рӯзнома, қонунҳои муҳим, аз ҷумла Қонуни Ҷумҳурии Тоҷикистон «Дар бораи таҳсилоти миёнаи касбӣ» ва тағйиру иловаҳо ба қонунҳои конститутсионӣ, аз ҷумла «Дар бораи шаҳрвандӣ» ва «Дар бораи вазъи ҳуқуқии узви Маҷлиси миллӣ ва вакили Маҷлиси намояндагон», муҳокима ва ҷонибдорӣ шуданд.

Ҳамзамон, тағйиру иловаҳо ба қонунҳои соҳавӣ, аз ҷумла Кодекси манзил, Кодекси гумрук, қонунҳо оид ба воситаҳои нашъадор ва моддаҳои психотропӣ, хоҷагии деҳқонӣ, ҳифзи ҳуқуқҳои кӯдак, маориф, боҷи давлатӣ, савдои хориҷӣ ва ҳуҷҷати электронӣ ва имзои электронӣ баррасӣ ва қабул гардиданд.

Дар иҷлосия инчунин тағйирот дар ҳайати судяҳои Суди конститутсионӣ ва Суди Олии Ҷумҳурии Тоҷикистон, таъйиноти судяҳо ва машваратчиёни халқии Суди Олии Ҷумҳурии Тоҷикистон барои солҳои 2025–2030 тасдиқ шуд.

Дар фарҷом, бо қарори Маҷлиси миллӣ маҳалли аҳолинишини Дашти Ҳаштсари деҳоти Айнии ноҳияи Айни вилояти Суғд ба категорияи деҳа мансуб дониста шуда, номи он ба Ваҳдатобод иваз гардид.

Бо ҳамин иҷлосияи сеюми Маҷлиси миллии Маҷлиси Олии Ҷумҳурии Тоҷикистон, даъвати ҳафтум кори худро анҷом дод.

АКС: Маҷлиси миллии Маҷлиси Олии Ҷумҳурии Тоҷикистон

Визит Владимира Путина в Таджикистан: акценты на безопасности, миграции и региональной политике