Казакстандын вице-премьер-министри – улуттук экономика министри Нурлан Байбазаров Дүйнөлүк банктын тобуна кирген Эл аралык каржы корпорациясынын (IFC) секторлор аралык чечимдер боюнча вице-президенти Эммануэль Нижиринкиндри менен жолугушту.

Жолугушууда Казакстанга инвестиция тартуу жана ири инфраструктуралык долбоорлорду ишке ашыруу, анын ичинде мамлекеттик-жеке өнөктөштүк механизминин алкагындагы маселелер талкууланды.

«Өнөктөштүк жылдарында биз экономикалык маселелердин кеңири чөйрөсүн камтыган өз ара пайдалуу кызматташтыкты түзө алдык, аны мындан ары да өнүктүрүүгө ниеттенип жатабыз.  Тактап айтканда, инфраструктуралык долбоорлор чөйрөсүндө эл аралык IFC сертификаттары менен адистерибизди окутуу жана сертификациядан өткөрүү жана атайын фонддорду түзүү мүмкүнчүлүгүнө кызыкдарбыз», — деди Н.Байбазаров.

Вице-премьер-министр, ошондой эле Корпорациянын каржылык колдоосу менен ишке ашырылып жаткан долбоорлор Казакстандын туруктуу өнүгүүсүн жана экономикалык өсүшүн колдоодо негизги ролду ойноорун белгиледи. Өз кезегинде Эммануэль Нйижиринкиндри Эл аралык каржы корпорациясы Казакстандын потенциалын белгилеп, анын өнүгүүсүнүн артыкчылыктуу багыттарын колдоону уланта турганын билдирди.

Жолугушуунун жыйынтыгында IFC өкүлдөрү өлкөнүн туруктуу өсүшү үчүн мамлекеттик-жеке өнөктөштүктүн амбициялуу долбоорлорун ийгиликтүү ишке ашырууга көмөк көрсөтүү үчүн эл аралык тажрыйбаны жана ресурстарды берүүгө даяр экендиктерин билдиришти.

Сүрөт: Казакстан Республикасынын Премьер-министринин расмий маалымат ресурсу