Казакстан Республикасынын Премьер-министри Олжас Бектеновдун төрагалыгы алдында “Казакстан – Европа Биримдиги” диалогдук платформасынын 14-жыйыны өттү. Иш-чарага Евробиримдикке мүчө мамлекеттердин дипломатиялык өкүлчүлүктөрүнүн башчылары, ошондой эле европалык бизнес өкүлдөрү катышты.

Тараптар соода-экономикалык жана инвестициялык кызматташуу маселелерин, суу ресурстарын башкаруу жана айыл чарбасын өнүктүрүү жаатындагы иштердин келечегин талкуулашты.

«Мамлекет башчысы Касым-Жомарт Токаев Өкмөткө агроөнөр жай комплексин өнүктүрүү жана суу ресурстарын сарамжалдуу пайдаланууну камсыздоо милдетин койду. Айыл чарбасы жана тамак-аш өнөр жайы биздин экономиканын эң маанилуу тармактарынын бири. Бизде жогорку сапаттагы жана органикалык айыл чарба продукциясын, ошондой эле тамак-ашты өндүрүү үчүн чоң потенциал бар. Биз ЕБ рыногуна азык-түлүк экспортун көбөйтүүгө кызыкдарбыз. Европалык компаниялардын алдыңкы агротехнологияларын эске алуу менен сиздерди айыл чарба продукциясын өндүрүү жана кайра иштетүү боюнча биргелешкен долбоорлорду түзүүгө чакырабыз. Биз өз кезегибизде бизнес жүргүзүү үчүн жагымдуу шарттарды түзүү үчүн бардык күч-аракетибизди жумшоого даярбыз», — деди Олжас Бектенов.

О.Бектенов Казакстандын аймактарындагы учурдагы суу ташкын абалын эске алуу менен туруктуу суу инфраструктурасын өнүктүрүү үчүн ЕБ өлкөлөрү менен кызматташууну кеңейтүү зарылдыгын белгиледи.

«Табигый кырсыктын масштабы жана кесепеттери бизден ресурстарды туура пайдалануу жана келечекте ушуга окшош инциденттерди болтурбоо үчүн түп-тамырынан бери жаңы ыкмаларды колдонууну талап кылат. Бул маселеде бизди Европа өлкөлөрүнүн жана компаниялардын алдыңкы тажрыйбалары жана иштеп чыгуулары өзгөчө кызыктырат. Казакстан өкмөтүнүн күч-аракетин Евробиримдиктин жардам көрсөтүү программалары менен синхрондоштуруу маанилүү», — деп белгиледи Олжас Бектенов.

Учурда Казакстандын өкмөтү суу ресурстарын башкаруу системасын өнүктүрүү боюнча жаңы Концепцияны ишке ашырууда. Аны ишке ашыруу сууну ташуу учурундагы өндүрүмсүз коромжуларды кыскартууга, сугат жерлердин абалына мониторинг жүргүзүү системасын жакшыртууга, ошондой эле өзгөчө кырдаалдардын коркунучун азайтуу үчүн гидротехникалык курулуштарды модернизациялоого алып келет деп күтүлүүдө.

Сүрөт: Казакстан Республикасынын Премьер-министринин расмий маалымат булагы