4-июнда Казакстандын Президенти Касым-Жомарт Токаев Египет Араб Республикасынын Парламентинин Сенатынын Төрагасы Абдел Вахаб Абдель Разек менен жолугушту. Анын жүрүшүндө соода-экономикалык жана маданий-гуманитардык тармактарда эки тараптуу мамилелерди өнүктүрүү маселелери талкууланды.

Казакстандын лидери транспорт-транзиттик өнөр жай, туризм жана санариптештирүү боюнча биргелешкен инвестициялык долбоорлорду ишке ашырууну сунуштады.

«Сиздердин өлкө араб мамлекеттеринин ичинен биринчи болуп биз менен дипломатиялык мамиле түздү. Бүгүнкү күндө Египет Казакстандын ислам жана араб дүйнөсүндөгү негизги өнөктөштөрүнүн бири. Конструктивдүү саясий диалог түзүлдү. Көптөгөн эки тараптуу келишимдер жана макулдашуулар күчүндө. Биз бул импульсту сактап калууга жана кызматташтыкты кеңейтүү үчүн биргелешип иштөөнү улантууга даярбыз. Соода-экономикалык байланыштарды өнүктүрүү биздин кызматташтыгыбыздын негизи болушу керек, өзгөчө бул үчүн бизде жетиштүү потенциал бар», — деди Касым-Жомарт Токаев.

Өз кезегинде Абдел Вахаб Абдель Разек Египеттин президенти Абдель Фаттах ас-Сисинин саламын айтты.

«Биз эки тараптуу байланыштарды, анын ичинде парламенттер аралык байланыштарды мындан ары да чыңдоого кызыкдарбыз. Бул биздин жалпы максаттарыбызды натыйжалуу ишке ашыруу позициясынан алганда туура деп ойлоймун. Египетте Казакстанга өзгөчө жылуу мамиле жасашат. Биздин мамлекеттерди бириктирип турган көптөгөн жалпы нерселер бар. Жакынкы аралыкта өз ара пайдалуу жаңы келишимдер түзүлөт деп ишенем”,-деди Египет парламентинин сенатынын төрагасы.

Сүрөт: Казакстандын президентинин расмий сайты