Қазақстан Премьер-Министрінің орынбасары – Ұлттық экономика министрі Нұрлан Байбазаров Экономикалық ынтымақтастық және даму ұйымының (ЭЫДҰ) Еуразия бөлімінің басшысы Уильям Томпсонмен кездесу өткізді.
Қазақстан Үкіметі мен ЭЫДҰ Хатшылығының 2025 жылға дейінгі бірлескен іс-қимыл жоспары шеңберінде ұсынымдарды іске асыру, сондай-ақ ЭЫДҰ-ның Еуразиялық бәсекеге қабілеттілік бағдарламасы шеңберіндегі өзара іс-қимыл талқыланды.
ЭЫДҰ өкілі Республиканың ұйыммен өзара іс-қимылының оң тәжірибесін атап өтті. Ұсынымдарға сәйкес Қазақстанда бірқатар саяси және экономикалық өзгерістер жүргізілді: инвестициялық омбудсмен институты енгізілді, бюджет қаражатының пайдаланылуына парламенттік бақылау күшейтілді, елдің 2060 жылға дейінгі төмен көміртекті даму стратегиясы әзірленді, бизнесті жауапты жүргізу жөніндегі ұлттық байланыс орталығы және жоғары аудиторлық палата құрылды.
Бұдан басқа, аудандар мен облыстық маңызы бар қалалардың әкімдерін тікелей сайлау енгізілді.
Сонымен қатар, келіссөздер аясында ұйымның Қазақстандағы өкілдігін ашу туралы бастама көтерілді. Осылайша, Республика ЭЫДҰ кеңселері жұмыс істейтін төртінші ел бола алады. Аймақтық өкілдіктер қазірдің өзінде Қытайда, Индонезияда және Грецияда жұмыс істейді.
Өз кезегінде Нұрлан Байбазаров: «Біздің еліміз ЭЫДҰ-ның 15 жылдан астам тұрақты серіктесі және оның ұсынымдарын енгізу бойынша Орталық Азиядағы көшбасшы болып табылады. 2025 жылы Қазақстан осы беделді халықаралық ұйымға толыққанды мүше ретінде кіруге өтінім беруге ниетті. Біз одан әрі ынтымақтастық мемлекетіміздің дамуының әлеуметтік-экономикалық және құқықтық аспектілеріне сапалы әсер ететініне сенімдіміз».
Фото: Қазақстан Республикасы Премьер-Министрінің ресми ақпараттық ресурсы