Алматы, 28 сәуір 2025 жыл – Караван Инфо ақпараттық агенттігі.Алматыда Қазақстан, Қытай, Қырғызстан, Тәжікстан, Өзбекстан сыртқы саясат ведомстволарының басшылары, сондай-ақ Түрікменстанның өкілі қатысқан «Орталық Азия – Қытай» форматындағы сыртқы істер министрлерінің алтыншы кездесуі өтті.

Кездесуде саяси диалогты нығайту, сауда-экономикалық байланыстарды кеңейту, көлік байланысын дамыту, сын-қатерлер мен қауіп-қатерлерге бірлесіп қарсы тұру, сондай-ақ аймақтағы тұрақты даму мен экологиялық қауіпсіздік мәселелері талқыланды. Қатысушылар өзара құрмет пен теңдік қағидаттарына негізделген Орталық Азия елдері мен Қытайдың көпжақты ынтымақтастығын жақсарту бойынша ұсыныстарды талқылап, заманауи сын-қатерлерге теңгерімді көзқарастар қажеттігін атап өтті.

Қазақстанның Сыртқы істер министрі Мұрат Нұртілеу өз сөзінде «Орталық Азия-Қытай» форматын нығайтудың маңыздылығын атап өтіп, аймақтағы тұрақтылықты қамтамасыз ету үшін негізгі салалардағы ынтымақтастықты одан әрі кеңейтуге назар аударды. Ол бұл формат ОА+ тетіктері арасындағы флагманға айналатынына және алдағы уақытта өтетін көшбасшылар кездесуі елдер арасындағы қарым-қатынастың жаңа бетін ашатынына сенім білдірді.

Кездесуге қатысушылар жаһандық сын-қатерлер контекстінде сындарлы диалогты жалғастырудың, байланыстарды дамытудың және басым бағыттар бойынша күш-жігерді үйлестірудің маңыздылығын атап өтіп, осы форматтағы тұрақты кездесулерге дайын екендіктерін білдірді. Кездесу қорытындысы бойынша Орталық Азия – Қытай форматы аясында тату көршілік, тұрақты даму және көпжақты ынтымақтастықты тереңдету қағидаттарына ортақ міндеттемені біріктіретін Ақпараттық коммюнике қабылданды.

Фото:Қазақстан Республикасының СІМ